Bheegee aankhein dekh rahi hain
chitra kuchh dhundhle bachpan k
hathon ka apne palna banakar,
bhai mujhko jhula raha hai......
Kabhi kheenchta naak meri,
kabhi kheench deta hai choti.
Kabhi kahta gudiya muniya
kabhi chidata kahkar moti.
Ulte-seedhe naam rakhkar,
Dekho vo mujhko rula raha hai.....
Kal jaldi fir uthna hai,
ab to pyari bahna soja.
kal kar lenge baatein baaki,
ab meethe sapno mei khoja..
Aankho mei apni neend liye,
thapki de mujhko sula raha hai..
Par kya aaj udas bahut vo,
gam ne usko ghera hai,
kahta hai raah na sujhti koi,
chahun or gahan andhera hai,
kuchh apne man ki kahne ko,
bhai mujhko bula raha hai....
Roko na koi aaj mujhe,
khol do in paaon ki bedee,
jana hi hoga aaj mujhe,
dagar ho chahe kitni tedee.
Kaandhe par mere sar rakhne ko
bhai mujhko bula raha hai.......
Mera bhai mujhko bula raha hai..
-Dr.seema agrawal
moradabad ( U.P )
No comments:
Post a Comment